Սուր Անկյուն
«Սուր անկյուն» հատվածում կարող եք արտահայտել առողջապահության ոլորտին առնչվող Ձեր գոհունակությունները, մտահոգությունները, հարցերը, անհանգստություններն ու դժգոհությունները: Յուրաքանչյուր հարց և անհանգստություն առաջիկայում կգտնի իր պատասխանն ու պատշաճ վերլուծությունը:
Թեմա՝ առողջապահական սպասարկում
Հարց՝
N1. Մեր պոլիկլինիկայում բոլոր բժիշկները մեկը մյուսի մասնագիտական կարողությունների վերաբերյալ բարձրաձայն կասկածներ են հայտնում, նույնիսկ շփոթեցնելով հիվանդին: Ինչպես վստահենք բժիշկներին, երբ բոլորն անխտիր միմյանց փնովում են ու վատաբանում: Մեկը մյուսին հերքելու մոլուցքով վարակված սկսում են իրար հակասել: Ին՞չ մեղք ունի հիվանդը:
Հայկ
N2. Մեր երկրում հնարավոր չէ մտածել որակյալ բուժ սպասարկման մասին, քանի դեռ մեր մենթալիտետը նույնն է մնացել: Մենք սիրում ենք բողոքել, սիրում ենք դժգոհել, բայց երբ գալիս է խնդիրները բարձրաձայնելու պահը, բոլորս էլ մոռանում ենք դրանք:
Անի
N3. Կարծում եմ ձեր "Սուր անկյունում" սրությունը պակասում է. Շատ մեղմ են արտահայտվում այցելուները: Իրականում այն, ինչ կատարվում է մեր պոլիկլինիկաներում ու հիվանդանոցներում, ավելի կոշտ որակելու կարիք ունի:
Մոնիկա
N4. Երբ փորձում ենք համեմատել արտերկրի ու հայկական բուժսպասարկումը, անչափ մեծ տարբերություն կա: Մեզ մոտ հիվանդանոցներում շատ ակնառու է պրոֆեսիոնալիզմի պակասը, բժիշկները շատ հաճախ են այլ "գործարքների" մեջ մտնում հիվանդի հետ:
Անահիտ
N5. Մեր հիվանդանոցներում անտեսված է հիվանդների հարազատների նկատմամբ որոշակի կուլտուրան: Վերջերս ես ականատես եղա, թե ինչպիսի արհամարհանքով ու վիրավորանքով է խոսում բժիշկը մարդկանց հետ: Անչափ վիրավորական է:
Գևորգ
N6. Այնուամենայնիվ եկեք չմոռանանք, որ հիվանդանոցային համակարգը մի փակ համակարգ է, որն ունի իր չգրված օրենքները, որոնք իրականում սարսափելի են' սկսած հավաքարարներից մինչև գլխավոր բժիշկ հիվանդը պետք է հարաբերվի այդ օրենքների շրջանակներում:
Տարոն
N7. Կոռուպցիան ու կաշառակերությունը երբեք էլ չեն վերանա մեր հիվանդանոցներից: Բոլորն էլ գիտեն այդ մասին:
Սամվել
N8. Ես գիտեմ, որ օրենքով արգելված է աշխատանքային ժամերին բժիշկների այլ գործով զբաղվելը: Սակայն բազմիցս տեսել եմ, որ նրանք հիվանդներին թողած այլ գործով են զբաղվում: Ասենք զրուցում են դեղերի գովազդով զբաղվողների հետ, կամ էլ իրենց ժամին իրենց աշխատասենյակում չեն: Սա միայն մի պոլիկլինիկայում չի, այլ համատարած:
Նունե
N9. Արդեն վաղուց մեր երկրում պոլիկլինիկաներում բուժսպասարկումն անվճար է: Սակայն չկա այնպիսի հաստատութոյւն, որտեղ բժիշկը կամ բուժքույրը գոնե չակնարկի վճարի մասին: Ես նույնիսկ գիտեմ դեպքեր, երբ բժիշկները դժգոհում են իրենց աշխատավարձից և պարզապես նշում, որ իրենք այլ ելք չունեն, քան այցելուի դրամով ապրելը:
Աննա
N10. Կարծում եմ խոսքը նորմալ բժիշկների մասին չէ: Իմ համոզմամբ որակյալ մասնագետն անպայման և ապրուստ կունենա, և չի մնա հիվանդի տված փողի հույսին:
N11. Կաշառակերությունը բժշկական ասպարեզում ամենից տարածված երևույթն է: Այդ մասին բազում զրույցներ, քննարկումներ կան, սակայն այդպես էլ քարը տեղից չի շարժվում: Մինչև բուժաշխատողի աշխատավարձը չլինի ամենից բարձրը երկրում, նույնիսկ ուսուցչից ու դատավորից էլ բարձր, մեր երկրում առողջապահական համակարգը չի կարող նորմալ արդյունքներ գրանցել:
Թովմաս
N12. Ես բժիշկ եմ: Ինձ համար ցավալի են բոլոր որակումները, որ տալիս են ոլորտի հետ կապ չունեցող մարդիկ բժիշկների մասին: Չի կարելի բուժող մարդուն նման կերպ բնութագրել: Իսկ այն, որ բժիշկների մասնագիտական ու որակական աճին խանգարող շատ ու շատ հանգամանքներ կան, արդեն իսկ փաստ է: Բոլորին է հայտնի, որ բժշկի աշխատավարձը ցածր է: Սակայն այդ փաստն ասել ու անմիջապես բոլորին կոռուպցիայի մեջ մեղադրելը այնքան էլ ճիշտ չէ: Չէ որ բոլոր մարդիկ նույնը չեն:
Բժիշկ Մարտիրոսյան
N13. Ցավալի կարող են լինել մասնագիտական տեսանկյունից, սակայն ցավալի է նաև փաստը, որ այս ամենանուրբ ոլորտում դեռևս կան և շարունակում են լինել նման երևույթներ:
Գայանե
N14. Ես բուժաշխատող եմ, ու բավականին հաջողակ, ես չեմ դժգոհում ոչ իմ վաստակից, ոչ էլ իմ աշխատանքից: Սակայն պետք է ասեմ, որ ինձ ևս դիպչում է այդ խարանը: Երբեմն ես ամաչում եմ, չեմ ուզում բարձրաձայնել, թե բժիշկ եմ: Քանի որ բոլորի մոտ տպավորություն է, թե ես կաշառակեր եմ ու վատ մասնագետ: Հարգելի քաղաքցիներ, փոխեք ձեր վերաբերմունքն այս մասնագիտության նկատմամբ:
Քրիստինե
N15. Գիտեք ինչն է հետաքրքիր. Բոլորը բողոքում են բժիշկներից, բայց առանց բժիշկների ապրել չեն կարող:
Արման
N16. Պարզապես պետք է հանդուրժող լինել: Մեր երկրում ամեն ինչ կամաց-կամաց տեղն է ընկնում: Ամեն ինչ կարծու եմ լավ կլինի:
Աննա
N17. Ես համոզված չեմ, թե այս ոլորտը երբևէ կկանոնակարգվի, քանի որ բժիշկները ամեն ինչի պատասխանն ու արդարացումը գտնում են: Բայց որևէ արդարացում չի կարող լինել այն մասնագետին, ով հղի կնոջը կարող է սպասեցնել ժամերով, իսկ վերջում ինչ-որ տեղեկանք գրելու համար "գոնե 1000 դրամ" փող ուզել: Մանավանդ, երբ ծննդօգնությունը մեր երկրու անվճար է:
Ալինա -սեփական փորձից
News
